Xarakada Al Shabaab ayaa shalay galab xukun dil ah ku fulisay nin horey u dilay dad kale.

Xukunkan ayaa waxa uu ka dhacay fagaare ku yaala magaalada Marka ee gobolka Shabeelaha Hoose, waxaana kasoo qeyb galay dad weyne aad u fara badan si ay u daawadaan qaabka uu u dhacayo dilka.

Ninka la qisaasay ayaa lagu magacaabi jiray Cabdi Maxamuud Cismaan “Qoorey”, waxaana lagu eedeeyey inuu horey u dilay labo qof oo mid ka mid ah uu ku dilay deegaanka Ceelasha Biyaha halka mid kalena uu ahaa darawal.

Xukunka Dilkan ayaa waxaa ku dhawaaqay Qaadiga Guud ee Maxkamadda Xarakada Al Shabaab Sh. C/Xaq, isagoo sheegay in ninkan uu horey u dilay dad kale isla markaana ehelada dadkii la dilay ay codsadeen in loo qisaaso.

Qoorey oo ahaa ninka la qisaasay ayaa saxaafada u sheegay ka hor inta aan la qisaasin inuu ku qanacsan yahay xukunka lagu fulinayo isagoo Alle ka baryey inuu ka towbad aqbalo.